ವಿಜಯ ಸಂಘರ್ಷ ನ್ಯೂಸ್
ಶಿವಮೊಗ್ಗ: ನಗರದ ಹೃದಯಭಾಗ ದಲ್ಲಿರುವ ಬಿ.ಹೆಚ್. ರಸ್ತೆಯ ಯುನಿಲೆಟ್ ಅಪ್ಲೈಯನ್ಸಸ್ ಮಳಿಗೆಗೆ ನುಗ್ಗಿರುವ ದುಷ್ಕರ್ಮಿಗಳು, ಬರೋಬ್ಬರಿ ₹31.95 ಲಕ್ಷ ಮೌಲ್ಯದ ಹೊಸ ಮೊಬೈಲ್ ಫೋನ್‌ಗಳನ್ನು ದೋಚಿರುವ ಬೃಹತ್ ಕಳ್ಳತನ ಪ್ರಕರಣ ವೊಂದು ವರದಿಯಾಗಿದೆ.
ದೀಪಕ್ ಪೆಟ್ರೋಲ್ ಬಂಕ್ ಸಮೀಪವಿರುವ ಈ ಮಳಿಗೆಯ ಮುಂಭಾಗದ ಶಟರ್ ಬೀಗ ಗಳನ್ನು ಒಡೆದು ಒಳನುಗ್ಗಿರುವ ಕಳ್ಳರು ಈ ಕೃತ್ಯವೆಸಗಿದ್ದಾರೆ. ಜು: 21ರಂದು ರಾತ್ರಿ ಈ ಘಟನೆ ನಡೆದಿದ್ದು, ಮರುದಿನ ಬೆಳಿಗ್ಗೆ ಮಳಿಗೆಯ ಮ್ಯಾನೇಜರ್ ಕುಶಾಲ್ ಶೆಟರ್ ಅವರು ಬಾಗಿಲು ತೆರೆಯಲು ಬಂದಾಗಲೇ ಕಳ್ಳತನ ವಾಗಿರುವುದು ಬಹಿರಂಗವಾಗಿದೆ. ಒಳಗೆ ಪರಿಶೀಲಿಸಿದಾಗ, ರ್ಯಾಕ್‌ ನಲ್ಲಿದ್ದ ದುಬಾರಿ ಫೋನ್‌ಗಳು ನಾಪತ್ತೆಯಾಗಿದ್ದವು. ಚಾಲಾಕಿ ಕಳ್ಳರು ಕೇವಲ ಮೊಬೈಲ್‌ಗಳನ್ನು ಮಾತ್ರ ಕದ್ದೊಯ್ದಿದ್ದು, ಅವುಗಳ ಖಾಲಿ ಬಾಕ್ಸ್‌ಗಳನ್ನು ಅಂಗಡಿಯಲ್ಲೇ ಬಿಟ್ಟು ಜಾಗ ಖಾಲಿ ಮಾಡಿದ್ದಾರೆ.
ದೋಚಲಾದ ಒಟ್ಟು 40 ಮೊಬೈಲ್ ಗಳಲ್ಲಿ 20 ಐಫೋನ್‌ಗಳು (ಮೌಲ್ಯ ₹20,28,900) ಹಾಗೂ 12 ಒಪ್ಪೋ (OPPO) ಬ್ರಾಂಡ್‌ನ ಫೋನ್‌ಗಳು (ಮೌಲ್ಯ ₹7,72,980) ಸೇರಿವೆ. ಒಟ್ಟಾರೆ ₹31,95,946 ನಷ್ಟವಾಗಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಈ ಕುರಿತು ಜುಲೈ 22ರಂದು ರಾತ್ರಿ ಕೋಟೆ ಪೊಲೀಸ್ ಠಾಣೆಯಲ್ಲಿ ನೂತನ ಕಾನೂನು ಭಾರತೀಯ ನ್ಯಾಯ ಸಂಹಿತೆ-2023ರ ಕಲಂ 331(4) ಮತ್ತು 305ರ ಅಡಿಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿಗಳ ಬಂಧನಕ್ಕೆ ಪೊಲೀಸರು ಬಲೆ ಬೀಸಿದ್ದಾರೆ.