ವಿಜಯ ಸಂಘರ್ಷ
ಸಾಗರ : ತಾಲ್ಲೂಕಿನ ಆನಂದಪುರ ಸಮೀಪದ ನಂದಿತಳೆ ಗ್ರಾಮದ ವಾಸದ ಮನೆ ಹಾಗೂ ಕೊಟ್ಟಿಗೆಗೆ ಆಕಸ್ಮಿಕ ಬೆಂಕಿ ತಗುಲಿ ಒಂದು ಹಸು ಸಂಪೂರ್ಣ ಬೆಂಕಿಗೆ ಆಹುತಿಯಾಗಿ ದಾರುಣ ಸಾವನ್ನು ಕಂಡಿದೆ.
ನಂದಿತಳೆಯ ಪ್ರಕಾಶ್ ಆಚಾರ್ ಎಂಬುವವರ ವಾಸದ ಮನೆ ಹಾಗೂ ಅದಕ್ಕೆ ಹೊಂದಿಕೊಂಡ ಕೊಟ್ಟಿಗೆ ಮನೆಗೆ ತಡರಾತ್ರಿ 12.30 ರ ಸುಮಾ ರಿಗೆ ಆಕಸ್ಮಿಕ ಬೆಂಕಿ ತಗುಲಿದೆ.
ಮನೆಯಲ್ಲಿ ಮಲಗಿದ್ದ ಅವರ ಮಗ ಆದರ್ಶ ಎಂಬುವವರ ಅರಿವೆಗೆ ಬಂದ ತಕ್ಷಣ ಕೊಟ್ಟಿಗೆಯಲ್ಲಿದ್ದ 5 ಹಸುಗಳ ಪೈಕಿ 4ನ್ನು ಬೆಂಕಿಯ ಕೆನ್ನಾಲಿಗೆಯಿಂದ ಹೊರತಂದರಾದರೂ 1 ಹಸುವು ಮಾತ್ರ ಅಲ್ಲಿಯೇ ಸಂಪೂರ್ಣ ಬೆಂಕಿಗೆ ಆಹುತಿಯಾಗಿಬಿಟ್ಟಿತ್ತು. ಪಾರಾದ 4ರ ಪೈಕಿ ಒಂದು ಹಸುವು ಸುಟ್ಟ ಗಾಯ ಗಳಿಂದ ಬಳಲುತ್ತಿದ್ದು ಅದರ ಸ್ಥಿತಿ ಚಿಂತಾಜನಕವಾಗಿದೆ.
ಬಡಕುಟುಂಬದವರಿಗೆ ಆಸರೆ ಯಾಗಿದ್ದ ಮನೆ ಹಾಗೂ ಕೊಟ್ಟಿಗೆ ಎರಡೂ ಇಲ್ಲದಂತಾಗಿದೆ. ಸರ್ಕಾರ ಇವರೆಡೆ ಸಹಾಯಹಸ್ತ ಚಾಚಬೇಕಿದೆ.
ಸಮಯಕ್ಕೆ ಬಾರದ ಅಗ್ನಿಶಾಮಕ ದಳ:
ಈ ಘಟನೆಯ ಸ್ಥಳಕ್ಕೆ ತಕ್ಷಣ ಆಗಮಿಸುವಂತೆ ಅಗ್ನಿಶಾಮಕ ದಳಕ್ಕೆ ಕರೆ ಮಾಡಿದಾಗ ನೀರನ್ನು ಲೋಡ್ ಮಾಡಿಲ್ಲ ಲೋಡ್ ಮಾಡಿಕೊಂಡು ಬರಲಾಗುತ್ತದೆ ಎಂಬ ಉಡಾಫೆ ಉತ್ತರ ಬಂದಿದ್ದು ಸ್ಥಳೀಯರೆಲ್ಲರೂ ಸೇರಿ ಬೆಂಕಿ ನಂದಿಸಿದೆವು ಎಂದು ಗ್ರಾಮಸ್ಥರು ತಮ್ಮ ಅಳಲನ್ನು ತೋಡಿ ಕೊಂಡರು. ಪಶುಆಸ್ಪತ್ರೆ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ ಗಾಯಗಳಿಂದ ಬಳಲುತ್ತಿದ್ದ ಹಸುಕರುಗಳಿಗೆ ಪ್ರಾಥಮಿಕ ಚಿಕಿತ್ಸೆಯನ್ನು ನೀಡಿದರು. ಪೊಲಿಸ್ ಇಲಾಖೆ ಸ್ಥಳ ಮಹಜರು ಮಾಡಿ ಪ್ರಕರಣ ದಾಖಲಿಸಿಕೊಂಡಿದೆ.
ಸುದ್ದಿ ಹಾಗೂ ಜಾಹೀರಾತಿಗಾಗಿ ಸಂಪರ್ಕಿಸಿ
+919743225795