.ದಸರಾ ಆಚರಣೆಗೆ ಸರ್ವರೂ ಸಹಕರಿಸಿ: ಶೃತಿ ವಸಂತ ಕುಮಾರ್

ವಿಜಯ ಸಂಘರ್ಷ

ಭದ್ರಾವತಿ: ನಾಡಹಬ್ಬ ದಸರಾ ಆಚರಣೆಗೆ ಭದ್ರಾವತಿಯ ಸರ್ವರೂ ಸಹಕಾರ ನೀಡಬೇಕೆಂದು ನಗರಸಭೆ ಅಧ್ಯಕ್ಷೆ ಶೃತಿ ವಸಂತಕುಮಾರ್ ಕೋರಿದರು.

ಅವರು ಸೋಮವಾರ ನಗರಸಭೆ ಯಲ್ಲಿ ಆಯೋಜಿಸಲಾಗಿದ್ದ ಸಭೆಯಲ್ಲಿ ಅಧ್ಯಕ್ಷತೆವಹಿಸಿ ಮಾತನಾಡಿ, ಶಾಸಕರ ನೇತೃತ್ವದಲ್ಲಿ ವಿವಿಧ ದೇವಾಲಯಗಳ ಸಭೆ ನಡೆಸಿ ಸಲಹೆ ಪಡೆಯಲಾಗಿದೆ. ಜನತೆ ಸಹ ಆಚರಣೆಯಲ್ಲಿ ತೊಡಗಿಸಿಕೊಂಡು ಯಶಸ್ವಿ ಗೊಳಿಸುವಂತೆ ಮನವಿಮಾಡಿದರು.

ಪೌರಾಯುಕ್ತ ಮನು ಕುಮಾರ್ ಮಾತನಾಡಿ, ಈ ಬಾರಿಯ ದಸರಾ ಆಚರಣೆಯಲ್ಲಿ ವಿದ್ಯುತ್ ದೀಪಾಲಂಕಾರಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಪ್ರತಿ ವರ್ಷದ ಸಂಪ್ರದಾಯ ದಂತೆ ಈ ಬಾರಿಯೂ ಪೂಜಾ ವಿಧಿವಿಧಾನ ಗಳನ್ನು ನಡೆಸಲಾಗುವುದು ಎಂದರು.

ಆಚರಣೆಯ ಯಶಸ್ಸಿಗಾಗಿ ಉಸ್ತುವಾರಿ ಸಮಿತಿ, ಸ್ವಾಗತ ಸಮಿತಿ,ಸಾಂಸ್ಕೃತಿಕ ಮತ್ತು ಮೆರವಣಿಗೆ ಸಮಿತಿ, ಪ್ರಚಾರ ಮತ್ತು ಅಲಂಕಾರ ಸಮಿತಿ, ಮನರಂಜನಾ ಸಮಿತಿ, ಕ್ರೀಡಾ ಸಮಿತಿ, ದೇವರುಗಳ ಉತ್ಸವ ಸಮಿತಿ, ಆಯುಧಪೂಜೆ ಉಸ್ತುವಾರಿ ಸಮಿತಿ ರಚಿಸಲಾಗಿದೆ ಎಂದು ಮಾಹಿತಿ ನೀಡಿದರು.

ನಗರಸಭೆ ಉಪಾಧ್ಯಕ್ಷೆ ಸರ್ವಮಂಗಳ, ಸದಸ್ಯರಾದ ಮೋಹನ್ ಕುಮಾರ್, ಬಸವರಾಜ್ ಆನೇಕೊಪ್ಪ, ಚೆನ್ನಪ್ಪ ಸೇರಿದಂತೆ ಹಲವರು ಅಧಿಕಾರಿಗಳು ಹಾಜರಿದ್ದರು.